فيلم السرب بدون حرق

متابعة نانيس هنري 

كتب إسلام الشاذلي

فيلم "السرب" بيحكي عن وقائع حقيقية وهي قصة الضربة الجوية اللي نفذتها القوات المسلحة المصرية ضد تنظيم دا-ع.ش في ليبيا سنة 2015 وخلفية الاحداث بقى من شغل استخباراتي وعسكري.

الفيلم من إخراج أحمد نادر جلال وبالنسبالي ده اقوى عمل له في اخر كام سنة على مستوى الاكشن وتصميم المعارك اللي اتعمل باحترافية شديدة جدا او حتى جانب الدراما. الفيلم انت عارف قصته وعيشتها من اولها لاخرها فا بالتالي مفيش مفاجآت في الفيلم لكن كونك برضو تتفاجئ والأحداث تفضل بتشدك من الاول لحد اخر الفيلم وتفضل مش عارف حقيقة الشخصيات ده يقول ان الفيلم مكتوب كويس ومتنفذ كويس كمان بواقعية شديدة كأنك عايش الحدث بجد.

الأداء التمثيلي هايل من كل الممثلين وكل واحد بيعمل الشخصية وهو حاسسها بجد وده يمكن جي من شعورهم بمسؤولية انهم بيجسدوا شخصيات فيه منهم عايش لحد النهاردة ومسؤولية كمان دورهم التاريخي في القصة الحقيقية وبالنسبالي اعلى اداء كان محمد ممدوح و اداء احمد السقا وشريف منير ونيللي كريم وصبا مبارك ومصطفى فهمي وكل ضيوف الشرف حتى لو ظهورهم كان في مشهد واحد او اتنين لكل ضيف فيهم زي اسر ياسين واحمد حاتم واحمد صلاح حسني ومحمد فراج وكريم فهمي وعمرو عبدالجليل وغيرهم كله محستش فيهم باي تهاون  نهائي.

السيناريو بقى مكتوب حلو اوي بيظهر الجانب الإنساني في كل شخصيات الفيلم والتأثير النفسي للأحداث سواء على الناس اللي تأثرت بيها بشكل مباشر سواء اهالي الشهد.اء من الجي.ش او الشهد.اء من ضحاي.ا دا.ع.ش. الاهتمام كمان بتوصيل رسايل سياسية واضحة ومباشرة في الفيلم كان عاجبني جدا وده اللي كنت منتظره. 

استخدام طائرات حقيقية في المشاهد مدي طبعا مصداقية وواقعية كبيرة جدا خصوصا ان كمان اماكن التصوير مشابهة للحقيقة بجد فعلا ولما كان في مزج بين مشاهد حقيقية ومشاهد الفيلم كان باين مدى التشابه اللي ممكن يوصل في بعض المشاهد للتطابق بدون مبالغة.

بشكل عام "السرب" هو عمل فني إضافة مهمة للسينما المصرية .وربنا يرحم كل الشهداء اللي ضحوا نفسهم عشانا

تقييم الفيلم 10/10دخلتوه ولا لسه؟